UBUYOBOZI BW’AKARERE KA KARONGI BWAGARAGAJE INGAMBA ZO GUKUMIRA UBUCUKUZI BUTEMEWE N’AMATEGEKO N’IMPANUKA ZO MU MUHANDA

Kuri uyu wa 24 Nzeri 2026, Umuyobozi w’Akarere ka Karongi, Bwana Muzungu Gerald, yitabiriye ikiganiro n’abanyamakuru cyateguwe n’Intara y’Iburengerazuba, cyitabiriwe n’abanyamakuru baturutse mu turere tugize iyi Ntara. Iki kiganiro cyayobowe na Guverineri w’Intara y’Iburengerazuba, Bwana Ntibitura Jean Bosco, kikaba cyari kigamije kugaragaza ibikorwa n’iterambere by’Intara, kungurana ibitekerezo n’itangazamakuru no gusubiza ibibazo by’abanyamakuru ku bibazo bireba abaturage.

Muri iki kiganiro, Meya Muzungu Gerald yifatanyije na Guverineri Ntibitura Jean Bosco mu gusubiza ibibazo byerekeranye n’Akarere ka Karongi, birimo ingamba zo gukumira ubucukuzi bw’amabuye y’agaciro butemewe n’amategeko, umutekano wo mu muhanda, ibibazo by’abarobyi ku bijyanye no kuroba isambaza mu kiyaga cya Kivu mu gihe gifunze, kwishyura ba rwiyemezamirimo bubakiye inzu abaturage bagizweho ingaruka n’ibiza, ndetse n’imirimo yo gusana umuhanda uhuza Karongi na Rutsiro werekeza i Gihara.

Ku bijyanye n’ubucukuzi bw’amabuye y’agaciro butemewe n’amategeko, Meya Muzungu Gerald yavuze ko Akarere gafatanya n’inzego z’umutekano mu gukumira no kurwanya ibyo bikorwa. Yagaragaje ko abantu bafatirwa muri ibyo bikorwa bashyikirizwa ubutabera, aho abasaga 160 bamaze gukatirwa n’inkiko ibihano by’igifungo kiri hagati y’amezi atandatu n’imyaka ine. Yavuze ko ibi bihano bigamije gukumira ibikorwa by’ubucukuzi butemewe n’amategeko no guca intege abashobora kubyinjiramo.

Ku kibazo cy’impanuka zikunze kubera mu gice cy’umuhanda wo mu Kigezi, mu Murenge wa Bwishyura, Meya Muzungu Gerald yavuze ko Akarere, ku bufatanye na Rwanda Transport Development Agency (RTDA), Polisi y’u Rwanda ndetse na sosiyete ishinzwe uwo muhanda, basuzumye iki kibazo kandi baganira ku ngamba zo kugabanya impanuka.

Muri izo ngamba harimo kugabanya ubukana bw’ikorosi riri muri ako gace, gushyiramo ibyuma cyangwa ibindi bikoresho bigabanya umuvuduko w’ibinyabiziga, ndetse no kongeramo ibyapa biburira abagenzi n’abatwara ibinyabiziga kugira ngo barusheho kwitwararika.

Iki kiganiro n’abanyamakuru cyabaye umwanya wo gusobanura ibikorwa biri gukorwa mu Ntara y’Iburengerazuba no gusubiza ibibazo by’itangazamakuru ku bibazo bitandukanye bireba abaturage, hanagaragazwa ubufatanye hagati y’inzego z’ibanze, iz’umutekano n’izindi nzego mu gushakira ibisubizo ibibazo bibangamiye imibereho n’umutekano by’abaturage.